Shkuan në zyrë të pavaksinuar, CNN pushon nga puna 3 punonjës
Rrjeti amerikan i lajmeve CNN ka shkarkuar tre punonjës pasi hynë në zyrë të pa vaksinuar.
Ky është një nga shembujt e parë të një firme amerikane e cila pushon punonjës për shkelje të rregullave të vaksinimit të kompanisë.
Shumë firma amerikane si Facebook dhe Google gjithashtu thanë se do të kërkojnë që punonjësit e tyre të vaksinohen në mënyrë që në muajt e ardhshëm të rikthehen në zyra.
Shefi i CNN Jeff Zucker përmendi letrën e kompanisë e cila e ka të detyruar vaksinimin, pasi sipas tyre kushdo që raporton në terren, në zyrë me punonjës të tjerë duhet të vaksinohet që të mos jetë rrezik për të tjerët dhe veten.
“Më lejoni të jem i qartë – ne kemi një politikë të tolerancës zero për këtë,” tha Zucker.
Në maj, qeveria amerikane tha se do të ishte e ligjshme që punëdhënësit të kërkonin që personeli të vaksinohej kundër Covid-19.
Linjat ajrore kryesore Delta dhe United Airlines po kërkojnë që punonjësit e rinj të tregojnë dëshmi të vaksinimit, ndërsa banka e investimeve Goldman Sachs po kërkon që punonjësit e saj të zbulojnë statusin e tyre të vaksinimit.
© Panorama.al