Shëndeti seksual është një nga temat më të diskutuara në kohën e fundit. Në veçanti një theks i veçantë i vendoset parandalimit dhe diagnostikimit të hershëm. Një ndër shqetësimet më të mëdha është virusi HIV dhe SIDA.
Profesionistët mjekësorë thonë që diagnostikimi i hershëm është çelësi kryesor menaxhues në kontrollimin e HIV-it. Në kohën e sotme ata këshillojnë që çdo person i cili është seksualisht aktiv t’i nënshtrohet testimit për virusin e HIV-it. Kjo metodë shoshitëse do të mundësojë menaxhimin më të mirë si dhe reduktimin e shpërndarjes së virusit.
Një zbulim i madh në këtë fushë është pajisja për testimin e HIV-it në shtëpi. Kjo pajisje ka dalë në shitje në Britani nga kompania Biosure në mënyrë elektronike. Është pajisja e parë e miratuar nga ligji që ua mundëson njerëzëve të marrin rezultatet e HIV-it në vetëm 15 minuta në shtëpi. Kjo pajisje premton një saktësi me 99.7% pas tre muajsh nga ekspozimi ndaj virusit të HIV-it.
Pajisja funksionon duke zbuluar antitrupat anti-HIV, proteinat që luftojnë kundër virusit të HIV-it. Për testim nevojitet një pikë gjaku nga maja e gishtit, dhe në rast të një rezultati pozitiv dalin dy vija të purpurta në pajisje.
Imazhi i adaptuar nga: http://i4.mirror.co.uk/incoming/article5588131.ece/ALTERNATES/s615/BioSURE.jpg
Ekspertët rekomandojnë që në rast të një rezultati pozitiv të kërkohet ndihma profesionale mjekësore në mënyrë që të vërtetohet diagnoza. Profesionistët garantojnë që njerëzit që do të rezultojnë pozitiv nuk do të ngelin pa mbështetje, atyre do t’iu ofrohet një mbështetje sa më e mirë mjekësore.
Llogaritet që pothuajse gjysma e njerëzëve që jetojnë me HIV e zbulojnë këtë gjë shumë vonë, diku deri katër vite pasi kanë jetuar të infektuar. Duke iu nënshtruar testit sa më herët që është e mundur mjekët thonë që prognoza është shumë më e mirë dhe parandalimi i komplikimeve është më shumë i mundshëm.
Ky zbulim është një hap i madh në shëndetin publik. Menaxherët e shëndetit seksual shpresojnë që ky testim të mundësojë kontrollin më të mirë të shpërndarjes së HIV-it. Shumë profesionistë mjekësorë e kanë mirëpritur këtë pajisje dhe ato shpresojnë që ky zbulimi t’i inkurajojë njerëzit që të testohen